فيتامين د مش بس للعظام!
ده ليه دور كبير في الغدد الصماء كمان

ناس كتير فاكرة إن فيتامين د مهم للعظام وبس، لكن الحقيقة إنه بيشتغل زي الهرمون، وبيأثر على حاجات كتير في الجسم، خصوصًا الغدد الصماء، اللي بتتحكم في هرموناتك وصحتك عمومًا.

تعالى نشوف إزاي

أولًا: تنظيم الكالسيوم والفوسفور

• فيتامين د بيشتغل مع الغدة الجار درقية وهرمونات تانية علشان يظبط الكالسيوم والفوسفور في الجسم.
• بيساعد الجسم يمتص الكالسيوم من الأكل، وده مهم للعظام وكمان للأعصاب والعضلات.
• لو فيتامين د قليل، الكالسيوم بيقل، وده يسبب مشاكل كتير في الجسم.

ثانياً: الصحة الإنجابية (للستات والرجالة)

• فيتامين د ليه مستقبلات في المبيضين والخصيتين، وده معناه إنه ليه دور في الخصوبة.

نقصه ممكن يسبب:
• ضعف الحيوانات المنوية عند الرجالة
• مشاكل في التبويض أو تكيس المبايض عند الستات
• بعض الدراسات بتقول إنه ممكن يساعد في علاج تأخر الحمل، خصوصًا مع الحقن المجهري.

ثالثاً: السكر والأنسولين

• نقص فيتامين د ممكن يخلي الجسم يقّاوِم الإنسولين، وده يزود فرصة الإصابة بالسكري.
• كمان بيساعد البنكرياس يفرز الإنسولين بشكل أحسن.
• وله دور كمان في تقليل الالتهابات وتنظيم المناعة، وده كله بيساعد في الوقاية من النوع التاني من السكر.

رابعًا: الغدة الدرقية والمناعة

• فيتامين د ممكن يكون ليه علاقة بأمراض زي هاشيموتو (كسل الغدة) أو جريفز (فرط نشاطها).
• الدراسات بتقول إنه ممكن يخفف من نشاط المناعة اللي بيهاجم الغدة.
• وفي ناس نقص فيتامين د عندهم بيكون مرتبط بارتفاع هرمون TSH والأجسام المضادة.

كمان ممكن يساعد في:

• تقليل الالتهاب
• تنظيم ضغط الدم
• وتحسين الدهون في الجسم
• وكمان تقوية المناعة ومنع أمراض مناعية تانية

نصيحة بسيطة:

لو بتشتكي من تعب ملوش سبب واضح، أو عندك مشاكل في الغدة أو السكر أو حتى الخصوبة… اطلب من دكتورك تحليل فيتامين د.
نقصه منتشر أكتر مما تتخيل، وعلاجه بسيط!