الغدة النخامية… سيدة الغدد!
تخيل إن جوا دماغك غدة صغيرة جدًا، بس هي اللي بتتحكم في باقي الغدد كلها!
الغدة النخامية بيسموها “سيدة الغدد الصماء” أو “الغدة الرئيسية”، لأنها بتفرز هرمونات بتدي أوامر لباقي الغدد في جسمك زي الغدة الدرقية، والغدد الكظرية، والغدد التناسلية، عشان كل حاجة في جسمك تشتغل بتنظيم.
إيه وظايف الغدة النخامية؟
الغدة دي بتفرز شوية هرمونات مهمين جدًا، وكل واحد فيهم ليه شغلانة خاصة:
* هرمون النمو (GH): ده المسؤول عن نمو العظم والعضلات، وخصوصًا عند الأطفال والمراهقين، وكمان بيحافظ على العضلات
عند الكبار.
•هرمون ACTH
ده بيخلي الغدة الكظرية تطلع الكورتيزول، اللي بيساعد جسمك يتعامل مع التوتر وبيظبط السكر والضغط.
* هرمون الحليب او البرولاكتين: ده اللي بيحفز إنتاج اللبن عند الأمهات بعد الولادة.
* هرمونات الذكوره والأنثوية دول بيتحكموا في الخصوبة، وبيأثروا على البويضات عند الستات والحيوانات المنوية عند الرجالة، وكمان الهرمونات الجنسية.
* هرمون المحفز للغده الدرقيه TSH ده بيشغل الغدة الدرقية، اللي مسؤولة عن الحرق والطاقة.
* هرمون ال ADH : ده بيخلي الكلى تحافظ على توازن الماية والأملاح في جسمك.
إمتى نشك إن في مشكلة في الغدة النخامية؟
لو حصل خلل في الغدة دي، سواء كانت شغالة زيادة أو أقل من الطبيعي، ممكن يظهر عليك أعراض زي:
* نمو مش طبيعي للأطفال، أو تغييرات غريبة في شكل الجسم عند الكبار
* زيادة أو نقص في الوزن من غير سبب واضح
* مشاكل في الإنجاب أو اضطرابات في الدورة الشهرية
* تعب مستمر أو تقلبات في المزاج والنوم
* صداع متكرر أو مشاكل في النظر
لو لاحظت أي أعراض من دي، أو حاسس إن جسمك مش متظبط، زيارة بسيطة لدكتور غدد صماء ممكن تفرق كتير في صحتك.
